Burco (Berberanews)-Ururka Suxufiyiinta Somaliland ee SOLJA, ayaa tababaro socon doona muddo saddex maalmood ah ku qabtay magaalada Burco ee xarunta Gobolka togdheer, kaasoo ay ka qaybgaleen in ka badan 50 suxufi oo la bari doona duruus la xidhiidha sharuuucda saxaafadda iyo mabaadii’da aas aaska u ah xorriyatal-qawlka ,iyo doorka saxaafadu ka qaadato hanaanka doorashooyinka.
Furitaankii tababarka oo ay ka soo qaybgaleen Madaxda maamulka gobolka, hogaanka Solja iyo masuuliyiin badan ayaa lagu qabtay huteel City Plaza ee Burco.
Guddoomiyaha Ururka Suxufiyiinta SOLJA Mr. Maxamuud Cabdi Jaamac (Xuuto), ayaa ka hadlay doorka ay saxaafadda Somaliland ka qaadato xorriyad-qawlka, waxaanu tibaaxay mabaadii’da ururkiisu u abuuran yahay inay kow ka tahay in la sugo xorriyadda hadalka iyo xorriyadda saxaafadda, sidaa darteedna bahda saxaafadda looga baahan yahay inay ka shaqeeyaan sidii loo sugi lahaa wararka iyo xaqa dadweynuhu u leeyihiin inay afkaartooda si cad oo sharci ah u dhiibtaan.
Guddoomiyaha SOLJA waxa uu u iftiimiyey in Solja xooga saaray in aqoonta iyo tayada suxufiyiinta kor loo qaado oo wax la baro si suxufiga loola xisaabtami karo,hadii kale suxufigu markaanu aqoon lahayn lalama xisaabtami karo,taasina waa ta keentay in tababaro kala duwan gobolada ugu qabano suxufiyiinta.
“Tababarada maanta ka furnay Burco waa laba tababar oo kala ah mid ku saabsaan sharuuucda saxaafadda iyo mabaadii’da aas aaska u ah xorriyatal-qawlka iyo mid ku la xidhiidha doorka saxaafadu ka qaadato hanaanka doorashooyinka.”
Waxaanu xusay in tababaradan ku qaban doonaan gobollada oo dhan.
Gudoomiye Ku Xigeenka Ururka Suxufiyiinta SOLJA, Mr.Kayse Axmed Digaale oo halkaasi ka hadlay ayaa sheegay in suxufiyiinta ka qaybgalayaasha tababarkani ka yimaadeen Gobollada Daadmadheedh, Togdheer,Buuhoodle iyo Saraar,tahayna markii labaad ee suxufiyiintan loo qabto tababar.Waxa uu intaa ku Daray Mr. Kayse in Solja u taagan tahay difaaca,ilaalinta Suxufiyiinta iyo Kor u qaadista aqoontooda, waxaanu u mahad celiyay suxufiyiinta ka timi Magaalada Buuhoodle oo ah markii u horeysay ee la siiyo tababar saxaafadeed,suxufiyiinta tababarka loo qabtayna ku adkeeyay inay ka faaiidaystaan duruusta tababarka oo ku dabaqaan shaqadooda.
Gudoomiye Ku Xigeenka Togdheer Maxamed Diiriye Xayd,ayaa soo dhaweeyay tababarkan una mahad celiyay ururka Solja, ” Tababarkan maanta Solja u qabatay suxufiyinta aad baa u soo dhaweynayaa ,waxaanan filayaa in aqoon badan ka korodhsan doonaan, oo aanay cidka ku gefi doonin, anaguna waxaanu balan qaadaynaa inaan gef loo gaysan karin.”
Mr. Yoonis Cali Nuur oo ka mid ahaa macalimiinta hagaysa tababaradan,ayaa tilmaamay in suxufiga aqoonta lahayni la mid yahay dhakhtar aan aqoon lahayn, sidaas darteed uu gaysan karo dhibaato badan,waxaanu ku guubaabiyay ka qaybgalayshii inay markasta ku dadaalaan sidii aqqonta u sii korodhsan lahaayeen.
Tababardan waxa kale oo ka qaybgalay Masuuliyiinta Xisbiyada qaranka ee gobolka,Madaxda Komishanka gobolka.
Tababaradan ayaa waxa kala maal-galisay hay’adda SIDA, isla markaana waxay soo marisay ururrada FORUMSYD, SLRF (Somaliland National Association in Sweden) iyo SONSAF, kuwaasoo qayb ka ah mashruuc saddex sanno ah oo Ururka SOLJA ka fulinayo Somaliland, halka tababarka labaad maalgalisay safaaradda Maraykanka ee Nairobi , waxaana loogu talo galay in saxaafadda lagu baro kaalinta ay ku leeyihiin hanaanka Doorashooyinka (Orientation Workshop on the Role of Media on electoral Process).
Ururka Solja, ayaa dadaal balaadhan ugu jira sidii suxufiyiinta Somaliland kor loogu qaadi lahaa tayada aqoontooda.