Sheekh-(Berberanews)- Wasaarada Hawlaha Guud iyo Guryeynta Somaliland iyo Maamulka Degmada Sheekh ayaa manta kulan ku saabsan Xeerka dhulka iyo dhismayaasha ku yeeshay Xarunta D/Hoose ee Dagmada Sheekh,
Kulan W/H/Guud kaga hadlayso wacyi galinta xeerka dhiska kana soo qayb galeen Masuuliyiin ka tirsan maamulka Degmada iyo Dadwayne kale oo badan, waxaa si wada jira uga hadlay kulan Masuulyiin ka socday W/H/Guud iyagoo faahfaahin dheeraada ka bixiyay Xeerkan waxaanay xuseen in aan wali Xeerkan la horgayn Golayaasha sharci dajinta.
Agaasimaha Waaxda Qorshaynta W/H/Guud Eng Raashiid Maxamed Cali oo ugu horayn halkaa ka hadlay ayaa ka xogwaramay Xeerkan iyo nuxurka uu xanbaarsanyahay isaga oo xusay in Dhismayaasha ay dhisaan Shirkadaha Dhismayaashu intooda badan aan la waafajin xaaladaha Caafimaad,Amaan,Deegaan iyo waliba billicda Magaalooyinka midna ,loona baahan yahay Xeer iyo nidaan u degsan qaybaha dhismayayaasha si ay Bulshada xaaladooda caafimaad u hagaagto loona helo dhismayaal ku haboon Deegaanada laga hirgalinayo.
Waxaa kaloo isna kulankan ka hadalay Agaasimaha Waaxda Dhulka iyo Guryaha Eng Maxamuud Maal Cali oo isna kulankan ka cadeeyay in W/H/Guud masuul ka tahay hantida la wada leeyahay ee laga hirgalinayo dhamaan qaybaha dalka ,Shirkadaha Dhismayaashana iyadu ay siiyaan Shahaadada ama Liisanka dhiska, xeerkana dhawaan la horgayn doono ansixintiisa Golayaasha sharci dajinta , Xeerkana uu yahay wixii kala hagi lahaa dhisaha iyo loo dhisaha isla markaana dhismaha Dalku lagu ilaalin doono Xeerkan kaasoo ay iska kaashan doonaan W/H/Guud iyo D/hoose ee Dalku iyada oo lagama maarmaan tahay in Bulshada lagu wacyi galiyo ilaalinta xuquqda degsiimada.
Gudoomiyaha Maxkamada Degmada Sheekh Garyaqaan Maxamed Cabdi ayaa sheegay in Xeerarka iyo Shuruucdu yihiin wixii uu ka imin lahaa isbedalka dhinaca horumarku iyo kala danbaynta Dhulka iyo Dhismaha ,iyada oo in badan sharci iyo xeer la’aan ugu fideen Bulshada dhexdeeda waxaa hubaal ah in xeerkani wax badan ka tari doono mustaqbalka degsiimada Tuulo ilaa heer Gobol.
Xoghayaha Dawlada Hoose C/karrin Yusuf Saleebaan ayaa aad u soo dhaweeyay Xeerkan isaga oo xusay inuu dawo u noqondoono isku qabsiga Dhuka iyo hagaajinta dhismayaasha laga hirgaliyo dhamaan qaynaha ay Degmadu ka koobantahay si wada jirana ay u samayn doonaan dabagalka tayada dhiska.
Qaar ka mida dadkii kulankan ka soo qayb galay ayaa aad u soo dhaweyay kuna tilmaamay mid xili hore loo baahnaa.
Khadar Jamac Xaashi
Berberanews
Sheekh