Italy-(Berberanews)-Jarmalka ayaa maxkamada sare ee Qaramada Midoobay u gudbiyay dacwad ka dhan ah Talyaaniga oo ku saabsan isku daygii gudaha Talyaaniga ee lagu doonayay in magdhow laga bixiyo dembiyadii dagaal ee xilligii Nazi-ga.
Isagoo u gudbiyay Maxkamadda Caalamiga ah ee Caddaaladda (ICJ), Jarmalku wuxuu sheegay in Talyaanigu uu sii wado oggolaanshaha kiisaska maxkamadaha gudaha inkasta oo 2012 uu go’aamiyay in sheegashadaas aan la aqbali karin.
Waxay leedahay, tan iyo xukunkaas, in ka badan 25 kiis oo cusub ayaa laga gudbiyay Talyaaniga.
Qaar ka mid ah kuwaas, maxkamaduhu waxay xukuntay in Jarmalku bixiyo magdhow.
Berlin waxay sheegtay in ay hadda keenayso cabashada sababtoo ah laba kiis oo socda kuwaas oo arki kara guryo ku yaal Rome oo ay leedahay dawladda Jarmalka oo la qabtay si loogu maalgeliyo bixinta magdhowga.
Maxkamad ku taalla dalka Talyaaniga ayaa sheegtay in 25-ka bishan ay go’aan ka gaashi doonto in lagu qasbo iibinta dhismayaal qaarkood, kuwaasoo qaarkood ay ku yaallaan goobo dhaqameed, taariikhi iyo waxbarasho oo Jarmal ah.
Khilaafkan ayaa soo bilowday sannadkii 2008-dii, markaasoo maxkamadda sare ee Talyaanigu ay xukuntay in Jarmalku bixiyo qiyaastii €1m (£840,000) oo la siiyo qaraabada sagaal qof oo ka mid ahaa 203 qof oo ay ciidammada Jarmalku ku dileen Tuscany sannadkii 1944-kii.
Jarmalku waxa uu ku doodayaa in uu ballaayiin Yuuro siiyay dalalkii uu saameeyay Dagaalkii Labaad ee Adduunka tan iyo markii uu dagaalka dhammaaday 1945-kii.
Soo xeraynteedu waxay soo xiganaysaa qayb ka mid ah xukunkii 2012 ee odhanaya, iyada oo u ogalaatay sheegashooyinka maxkamadaheeda, Talyaanigu “uu ku xad-gudbay waajibaadkii ka saarnaa in uu ixtiraamo xasaanadda ay Jamhuuriyadda Federaalka ee Jarmalku ku naaloonayso sharciga caalamiga ah”.
Sannado ayay qaadan kartaa in ICJ ay go’aanno kasoo saarto, balse Jarmalku wuxuu maxkamadda ka codsaday inay qaado tillaabooyin lagu joojinayo inuu Talyaanigu xaraasho hanti kasta inta kiiskiisa ballaadhan laga fiirsanayo.
Maxkamadda ICJ, oo fadhigeedu yahay magaalada Hague ee dalka Holland, ayaa ah hay’adda garsoorka ugu weyn ee Qaramada Midoobay, iyada oo mid ka mid ah doorkeeda aasaasiga ah ay tahay xallinta khilaafaadka sharci ee u dhexeeya dawladaha.
Berberanews.com
Info@berberanews.com
