Koonfur-Afrika-(Berberanews)-Milateriga Koonfur Afrika ayaa sheegay in ay daabulayaan in ka badan 10,000 oo askari si ay gacan uga geystaan gurmadka iyo samatabbixinta ka dib daadad xooggan oo ku dhuftay qeybo ka mid ah gobolka KwaZulu-Natal todobaadkii hore.
In ka badan 440 qof ayaa dhintay, waxaana weli socda baadigoobka 63 qof oo weli la la’yahay.
Qaar ka mid ah waxaa qaaday webiga. Dawladdu waxay ku dhawaaqday xaalad masiibo ah oo dalka oo dhan kasta ka jirta.
Isagoo khudbad u jeedinaya qaranka fiidnimadii Isniinta, madaxweyne Cyril Ramaphosa wuxuu ku dhawaaqay tallaabooyin taxane ah oo loogu talagalay in lagu caawiyo kuwa ay saameeyeen iyo dib-u-dhiska shaqada.
Saraakiisha ayaa ku tilmaamay daadadka qaar ka mid ah kuwii ugu xumaa ee abid soo mara gobolka KuzaZulu-Natal.
Ra’iisul wasaaraha KwaZulu-Natal Sihle Zikalala ayaa sheegay in ku dhawaad 4,000 oo guri ay burbureen in ka badan 8,000 oo kalena ay waxyeelo soo gaadhay, kuwaas oo intooda badan ah magaalo xeebeedka Durban iyo nawaaxigeeda.
Booliska iyo ciidamada labaduba waxay ka qaybqaateen dadaalka baadi goobka, iyadoo lix mayd oo kale la helay Axadii, sida ay sheegtay warbaahinta gudaha.
Mid ka mid ah haweenka ku nool magaalada Durban, Amanda Acheampong, ayaa sheegtay in meydadka afar ka mid ah qaraabadeeda laga soo saaray meel u dhow webiga, halka lix kalena la la’yahay.
“Gurigii dariska ayaa markii hore dumay, taas oo keentay in guriga qoyskayagu dumo oo qof walba ku maydho webiga. Afar mayd ayaa laga helay webiga – walaashay iyo saddex ay ayeeyo u tahay. Waa wax laga naxo,” Ms Acheampong ayaa laga soo xigtay.
Hadal ka soo baxay Ciiddanka Difaaca Qaranka Koonfur Afrika (SANDF) waxay ku sheegeen inay Ciiddankooda xoojin doonaan Hawlgalladda Baarista iyo Samatabbixinta, sidoo kalena ay gacan ka geysan doonaan sidii Gar-gaarka loogu qaadi lahaa dhibanayaasha.
Ciidamada iyo kuwa korontadu waxay sidoo kale ka shaqeyn doonaan meelaha ay biyo iyo korontadu ka maqan tahay muddo toddobaad ah, ayay raacisay.
Bulshada qaar ayaa gabi ahaanba go’an, sababtoo ah waxaa dumay jidad iyo buundooyin. “Koranto kuma haysanno meelo badan,” ayuu yidhi Imtiaz Syed, hogaamiyaha Isbahaysiga Muwaadiniinta.
Ku dhawaad 300 oo iskuul iyo qaar kamid ah xarumaha caafimaadka ayaa sidoo kale waxyeelo soo gaadhay.
Berberanews.com
Info@berberanews.com
