Finland-(Berberanews)-Finland ayaa qaadan doonta go’aan ku saabsan in ay codsato ku biirista 30-ka xubnood ee isbaheysiga NATO dhowrka toddobaad ee soo socda, sida ay warbaahinta u sheegtay ra’iisul wasaare Sanna Marin oo shir jaraa’id si wadajir ah ula qabatay dhiggeeda Sweden.
“Waxaa jira aragtiyo kala duwan oo lagu dalbanayo xubinnimada NATO ama inaan la codsan, waana inaan si taxadar leh u falanqeynaa kuwan,” Marin ayaa u sheegtay suxufiyiinta caasimadda Sweden ee Stockholm Arbacadii.
“Laakiin waxaan u maleynayaa in geeddi-socodkeenu uu noqon doono mid degdeg ah, waxay ku dhici doontaa toddobaadyo.”
Marin waxa ay sheegtay in baarlamaanku uu ka doodi doono qiimaynta rasmiga ah ee ku saabsan sida duulaanka Ruushka ee Ukraine uu u horseeday “isbeddelka jawiga amniga” iyo in la qiimeeyo samaynta isbeddel taariikhi ah oo ku saabsan booska difaaca Finland.
“Waxaan u baahanahay inaan si daacad ah uga hadalno cawaaqibka iyo khatarta, labadaba muddada dheer iyo muddada gaaban,” Marin ayaa tidhi.
Si kastaba ha ahaatee, waxay filaysay inaysan jirin “hab kale oo lagu heli karo dammaanad ammaan marka loo eego ka hortagga NATO iyo difaaca guud”
Finland iyo Sweden, oo wadaaga xuduud iyo deegaan ammaan oo isku mid ah, ayaa sii xoojiyay iskaashiga dhexdooda ah iyo NATO tan iyo markii Ruushka uu galay Crimea 2014.
