Wasiirkii hore ee arrimaha dibadda Soomaaliya Yuusuf Garaad Cumar oo haatan ah ergayga gaarka ah ee Geeska Afrika, Badda Cas iyo Gacanka Cadmeed ayaa soo saaray qoraal xasaasi ah oo ku aaddan doorashooyinka 2021-ka ee haatan ka socda dalka Soomaaliya.
Yuusuf Garaad ayaa tusaale cajiib ah ka bixiyey doorashada, isaga ku cabiray erayo kooban oo uu tilmaam kaga bixiyey ergada wejiyadooda qarisay iyo ‘boobka’ doorashada socota ee Golaha Shacabka.
“Afduubasho ma aha ee waa afduub. Waa la afduubay ee lama afduuban,” ayuu yidhi Yuusuf Garaad.
Qoraalkan ayaa dhaliyey hadal heyn xooggan, waxaana ka falceliyey dad fara badan oo qaarkood su’aalo ka keenay hadalka wasiirkii hore ee arrimaha dibadda Soomaaliya.
Sidoo kale, Yuusuf Garaad ayaa markale fasiraad ka bixiyey qoraalkiisa, isaga oo la wadaagay dadweynaha ku xidhan boggiisa gaarka ah ee Facebook-ga.
“In dan loo afduubtay iyo in duul kale loo afduubay waa sababta afduubka, laakiin falka dhacay waa afduub. Markaa waa la afduubay,” ayuu ku yidhi sharraxaaddiisa.
Hadalkan ayaa ku soo beegmay, iyadoo dood xooggan ay hadda ka taagan tahay sida ay ku bilaabatay doorashada Golaha Shacabka oo ay qaadaceen musharrixiinta mucaaradka.
Berberanews.com
Info@berberanews.com
