(Berberanews)–Ciidamada Jarmalka ayaa bilaabay in ay ka baxaan dalka Mali iyadoo Berlin ay doonayso in ay soo afjarto bisha May ee sanadka soo socda howlgalkaas oo ay caqabad ku noqdeen khilaafyo u dhaxeeya taliska militariga ee Bamako iyo imaatinka ciidamada Ruushka.
Berlin ayaa ku dhawaad 1,000 askari geysay dalka Mali, inta badan waxay u dhowdahay magaalada waqooyiga ku taal ee Gao halkaas oo ay hawshooda ugu weyn tahay inay sahan u sameeyaan hawlgalka nabad ilaalinta Qaramada Midoobay ee MINUSMA.
Milatarigu waxa ay bilaabeen in ay daabulaan qaybaha ugu horreeya oo gaadhaya ilaa 1,300 oo konteenar ah oo qalab ah, sida uu taliyaha Jarmalka ee Mali, Colonel Heiko Bohnsack, u sheegay wargeyska maalinlaha ah ee Tagesspiegel wareysi la daabacay Arbacadii.
Sidoo kale Arbacadii, xukuumadda Berlin waxay u gogol xaadhaysay muddo kordhintii ugu dambaysay ee tobanka sano ee hawlgalka ahaa illaa May 2024, go’aankaas oo weli ay ku xidhan tahay ansixinta aqalka hoose ee baarlamaanka.
MINUSMA waxaa la aas aasay 2013-kii si ay u taageerto ciidamada shisheeye iyo kuwa maxalliga ah ee dagaalka kula jira kooxaha Islaamiyiinta ah balse bilihii la soo dhaafay waxaa soo noqnoqonayay khilaaf u dhexeeya maamulka Mali iyo howlgalka.
