Hargeysa-(Berberanews)-Maxkamadda Sare ee Jamhuuriyadda Somaliland ayaa dhagaysatay Dacwad Idaari ah oo u dhaxaysay Urur-siyaasadeedka Talo-wadaag iyo Guddida Diwaangalinta Ururada iyo Ansxinta Axsaabta Qaranka, taasi oo ku qotontay Racfaan uu Ururka Talo-wadaag ka soo qaatay go’aan ay hore u soo saareen Guddida Diwaangalintu Ururada iyo Ansixinta Axsaabta Qaranka.
![](https://i0.wp.com/www.berberanews.net/wp-content/uploads/2022/11/fb_img_16690403368208171028381994116637.jpg?resize=696%2C499&ssl=1)
Maxkamadda ayaa dacwada dhagaysigeeda u fadhiisatay salaasadii oo ay bishu ku beednayd 15/11/2022-ka, waxaanay dhagaysatay dood-afeedkii iyo cadaymihii ay darafyadu ku soo bandhigeen Maxkamadda horteeda. Maxkamadda Sare ee Jamhuuriyadda Somaliland markii ay daristay doodii iyo dhammaan cadaymihii ay dhinacyadu u soo gudbiyeen, waxa ay xukuntay in Uur-siyaadeedka Talo-wadaag u gudbay tartanka Doorashada Axsaabta Qaranka, sidoo kale waxay Maxkamaddu fartay Guddida Diiwaangalinta Ururada Siyaasada iyo Ansixinta Axsaabta Qaranka in Urur-siyaasadeedka Talo-wadaag lagu daro liiska ururada gudbay ee loo gudbinayo Guddida Doorashooyinka Qaranka ee ka qayb qaadanaya tartanka doorashada Axsaabta Qaranka.
![](https://i0.wp.com/www.berberanews.net/wp-content/uploads/2022/11/fb_img_16690391926285928966405630288395.jpg?resize=696%2C928&ssl=1)
Waxa xusid mudan in ururadii Guddidu sheegtay in ay ka hadheen ama aanay buuxin shuruudaha loogu gudbayo tartanka doorashada Axsaabta Qaranka, uu Ururka Talo-wadaag oo kali ahi u soo gudbiyay Maxkamadda dacwad uu kaga soo racfaan qaatay go’aankaasi.
Halkan hoose ka akhriso xukunkii Maxkamadda Sare ka soo saartay dacwadan:-