India-(Berberanews)-Booliska dalka Hindiya ayaa toogasho ku dilay shabeel ka dib markii uu ugu yaraan sagaal qof ku dilay magaalada Champaran ee gobolka Bihar.
Bahalkan oo loogu magac daray “man-eater of Champaran”, ayaa la dilay ka dib markii ay ugaadhsadeen ku dhawaad 200 oo askari oo ka tirsan booliiska iyo mas’uuliyiinta degmada.
Qaar ka mid ah askarta ayaa ku kormeeray maroodiyaasha si ay u helaan.
Shabeelka labka ahi waxa uu argagixiyay bulshooyinka ku xeeran kaydka Shabeelka ee Valmiki.
Hindiya waxay hoy u tahay in ka badan 70% shabeelka duurjoogta ah ee adduunka.
Howlgalka ayaa waxaa hogaaminayay booliska gobolka Bihar, kuwaas oo isku gadaamay beer sokor ah oo u dhaw tuulada Sitaltola Baluwa si ay u dilaan shabeel saddex jir ah oo loo yaqaan T-104.
Kumar Gupta, oo ah madaxa ilaalinta duurjoogta ee gobolka, ayaa u sheegay Times of India in shabeelka loo aqoonsaday inuu “khatar ku yahay nolosha aadanaha”.
Agaasimaha kaydka Tiger ee Valmiki, Nesamani K, ayaa sheegay in ugaadhsigii ugu dambeeyay ee lagu raadinayo T-104 uu bilowday Sabtidii, wax yar ka dib markii uu soo baxay warka sheegaya in hooyo iyo ilmaheeda lagu dilay weerar shabeel.
“Waxay ahayd habeen hurdo la’aan ah tuulada oo dhan,” Paltu Mahato ayaa u sheegay Hindustan Times. “Iyadoo qaar naga mid ah ay dhagxaan isku garaacayeen, qaar kalena waxay garaaceen weel daasad ah si ay shabeelka isaga fogeeyaan.”
Isku daygii lagu doonayay in lagu dejiyo xayawaanka ayaa lagu guul daraystay, shabeelkuna waxa uu muujiyay “cabsi la’aan buuxda” markii ay ku hareeraysan yihiin kooxo, ayuu Mr Gupta ku daray.
Laba kooxood, oo laba maroodi kala wata, ayaa galay kaynta, mid saddexaadna waxa ay ku jireen heegan halkaas oo maamulku u maleeyay in shabeelku ka soo baxayo.
T-104 ayaa la toogtay 15:15 wakhtiga maxaliga ah Sabtidii.
