Kenya-(Berberanews)-Madaxweyne ku xigeenka dalka Kenya William Ruto ayaa cafis weydiistay madaxweyne Uhuru Kenyatta kadib markii ay isku dhaceen labada nin kadib markii dib loo doortay sanadkii 2018-kii.
Khilaafka u dhexeeya madaxweyne Kenyatta iyo ku xigeenkiisa ayaa si cad u soo shaac baxay.
Madaxweynaha ayaan taageersanayn Mr Ruto inuu u tartamo xilka madaxtinimo ee doorashada bisha Ogosto, wuxuuna taa beddelkeeda dhabarka ku sitaa hogaamiyaha mucaaradka Raila Odinga.
Mr Ruto ayaa hadaladiisa ka jeediyay kulan sanadle ah oo quraac ah oo uu soo qabanqaabiyay baarlamaanka – iyadoo Mr Kenyatta uu ka soo qeyb galay.
Madaxweyne ku xigeenka oo khudbad ka jeediyay kulanka, ayaa shacabka Kenya ka codsaday inay cafiyaan mid ka mid ah qaladaadka dowladda, ka dibna waxa uu Mr Kenyatta ku tilmaamay “Saaxiib wanaagsan”. “Waxa kale oo aan ogahay in anigoo ah madaxweyne ku-xigeen laga yaabo in aan ka gaabiyay rajadii laga filayay madaxayga, mudane madaxweynaha – saaxiibkay wanaagsan, waxaan kaa codsanayaa cafis,” ayuu yidhi.
Isagoo hadalkiisa sii wata ayaa u rajeeyay madaxweynaha inuu si nabad ah shaqada uga fadhiisto.
Mr Kenyatta, oo dhameysanaya xilli ciyaareedkiisa labaad iyo kii ugu dambeeyay sanadkan, ayaan wax jawaab ah ka bixin hadalka Mr Ruto.
Madaxweynuhu awood uma laha inuu xilka ka qaado ku xigeenkiisa – waxa xilka laga xayuubin karaa oo keliya haddii xilka laga qaado ama uu xil-gudasho la’aan yahay.
