Hague-(Berberanews)Hogaamiyihii hore ee maleeshiyaadka Jamhuriyadda Afrikada Dhexe (CAR) ayaa markii ugu horeysay ka soo muuqday Maxkamadda Caalamiga ah ee Dambiyada (ICC) ee magaalada Hague, isagoo lagu eedeeyay inuu galay dambiyo dagaal iyo dambiyo ka dhan ah aadanaha.
Maxime Jeoffroy Eli Mokom Gawaka ayaa horraantii bishan waxaa u gacan galiyay ICC-da Chad,kadib amar la soo xidhay.
Isku duwaha qaranka ee koox u badan maleeshiyaad Kiristaan ah, ayaa looga shakisan yahay in uu geystay xad-gudubyo ka dhan ah dadka Muslimiinta ah, oo ay ku jiraan dil, jidhdil iyo adeegsiga carruurta inta u dhaxaysay 2013 ilaa 2014.
Qareenkiisa oo lagu magacaabo Nick Kaufman ayaa maxkamadda u sheegay in shuruudaha lagu xidhay ay yihiin kuwa aan la aqbali karin. Wuxuu sheegay in Mr Mokum inaan loo ogolayn inuu arko qareenkiisa.
Ka-muuqashada xigta ee ICC si loo xaqiijiyo dhageysiga eedeymaha ayaa noqon doona 31ka January 2023.
Malleeshiyaadka CAR waxa ay ku jirtay rabshado tan iyo markii isbahaysiga inta badan woqooyiga iyo muslimiinta u badan ee fallaagada ee loo yaqaan Seleka ay la wareegeen awoodda bishii March 2013.
Xukunkooda naxariis darada ah ayaa kiciyay malayshiyaadka Masiixiyiinta ah ee “anti-Balaka” ee iska soo horjeeda.
Dhowr ka mid ah hogaamiyayaashii hore ee labada kooxood ayaa wajahaya dacwad maxkamada ICC.
Laba hoggaamiye oo kale oo ka tirsan anti-Balaka ayaa horay loogu dacweeyay maxkamadda Hague, halka mid ka mid ah hoggaamiyeyaasha Seleka uu ku xidhan yahay xabsiga oo sugayo maxkamad.
