Syria-(Berberanews)-Madaxweynaha Suuriya Bashaar Al-Asad ayaa magaalada Dubai kula kulmay dhaxal-sugaha Dubai Sheikh Mohammed bin Rashid Al Maktoum, madaxtooyada Suuriya ayaa bayaan ay soo saartay ku sheegtay, booqashadiisii ugu horreysay ee uu ku tago dal Carbeed tan iyo markii uu billowday dagaalka Suuriya 2011-kii.
Assad ayaa sidoo kale la kulmay dhaxal-sugaha Abu Dhabi, Sheikh Mohammed bin Zayed Al Nahyan, wakaaladaha wararka ee dowladda sida ay ay tebiyeen Imaaraadka Carabta iyo Suuriya.
Kulankan ayaa imaanaya maalmo kadib sanadguuradii 11-aad ee kasoo wareegtay markii uu bilowday kacdoonka Suuriya, kaasoo aan ugu dambeyntii lagu guuleysan in Al-Asad uu xukunka ka tuuro.
Kulanka u dhexeeya Assad iyo Al Maktoum “ayaa lagu falanqeeyay xidhiidhka guud ee labada dal iyo rajada laga qabo in la ballaadhiyo wareegga iskaashiga laba geesoodka ah, gaar ahaan dhinacyada dhaqaalaha, maalgashiga iyo ganacsiga,” wakaaladda wararka ee Suuriya ee SANA ayaa sheegtay.
WAM, oo ah wakaaladda wararka Imaaraadka, ayaa ku warantay in labada hoggaamiye ay ka wada hadleen “arrimaha ay wadaagaan”, sida madaxbannaanida dhuleed ee Suuriya iyo ka bixitaanka ciidamada shisheeye ee dalka.
Booqashadan ayaa soo diraysa calaamadii ugu cad cad ee in qaar ka mid ah wadamada Carabta ay diyaar u yihiin in ay dib ula falgalaan madaxweynaha Suuriya oo mar si weyn loo diiday.
Dhowr waddan oo Carbeed ayaa dib u soo nooleynaya xidhiidhkii ay la lahaayeen Assad, oo ay ku jiraan Urdun iyo Lubnaan, kuwaas oo ku booriyay Mareykanka inuu khafiifiyo cunaqabateynta saaran Dimishiq si loo xoojiyo ganacsiga.
Suuriya ayaa laga saaray xubinimadii 22-ka xubnood ee ururka Jaamacadda Carabta, waxaana qaadacay dalalka deriska la ah, ka dib markii uu dagaalku qarxay 11 sano ka hor.
Boqolaal kun oo qof ayaa lagu dilay dagaalka, kaasoo barakiciyay kala badh dadka Suuriya.
Qaybo badan oo ka mid ah Suuriya ayaa la burburiyay waxaana dib u dhiska uu ku kici karaa tobanaan balaayiin doolar.
Wadamada Carabta iyo kuwa reer Galbeedka ayaa guud ahaan Al-Asad ku eedeeyay in uu mas’uul ka yahay la dagaalanka mudaaharaadyada 2011-ka ee isu bedelay dagaal sokeeye, waxaana ay taageerayaan mucaaradka maalmihii ugu horeeyay ee colaada.
Berberanews.com
Info@berberanews.com
