Rusia-(Berberanews)-Ruushka ayaa sheegay in uu “Liis joojina” ku daray Madaxweynaha Mareykanka Joe Biden, Ra’iisul Wasaaraha Canada Justin Trudeau iyo tobaneeyo ka mid ah saraakiisha ugu sarreysa Mareykanka ka mamnuucaya inay dalka soo galaan.
Biden, saraakiisha Mareykanka ee liiska ku jira waxaa ka mid ah Xoghayaha Difaaca Lloyd Austin, Madaxa CIA William Burns iyo La Taliyaha Amniga Qaranka Jake Sullivan.
Mamnuucidda ayaa jawaab u ahayd cunaqabateynta ay Washington ku soo rogtay saraakiisha Ruushka xilli uu Ruushku weeraray Ukraine.
Wasaaradda arrimaha dibadda ayaa goor dambe oo maanta ah ku dartay Trudeau liiska shaqsiyaadka la cunaqabateeyey.
Tallaabooyinkan ayaa u muuqday kuwo inta badan astaan u ahaa, maadaama wasaaradda arrimaha dibadda ay sheegtay inay ilaalinayso xidhiidhka rasmiga ah, haddii loo baahdona ay xaqiijinayso in xidhiidh heersare ah lala sameeyo dadka liiska ku jira.
