India-(Berberanews)-Markii A H Almas, oo 18 jira, iyo laba ka mid ah asxaabteeda ay soo galeen fasalkooda subaxnimadii Decembar, macallimaddu isla markiiba waxay ku qeylisay: “Ka bax.”
Gabdhaha Muslimaadka ah looma ogola inay fasalka fadhiistaan, sababtoo ah waxay xidhnaayeen xijaab.
“Markii aan nimid albaabka fasalka, macalinku wuxuu yidhi kuma geli kartaan xijaabka,” Almas ayaa u sheegtay Al Jazeera. “Waxay naga codsadeen inaan iska saarno.”
Wixii markaas ka dambeeyay, koox ka kooban lix arday oo Muslimiin ah oo wax ka barata kuliyadda haweenka ee ay dowladdu maamusho oo ku yaalla degmada Udupi ee gobolka Karnataka ee dalka Hindiya ee koonfurta ayaa lagu qasbay inay fadhiistaan bannaanka fasalka, sababtoo ah maamulka kulliyadda ayaa ku eedeeyay inay jabiyeen shuruucda maadaama xijaabku aanau ka mid ahayn lebiska dugsiga.
Laakiin gabdhaha ayaa Aljazeera u sheegay in Xijaabku uu yahay “qayb ka mid ah caqiidadooda” kuna dhaqmaana ay tahay “xaqa ay u leeyihiin sharciga”.
Waxay ku adkaysteen mawqif diidmo ah xitaa iyadoo maamulku lagu eedeeyay inuu adeegsaday “xeelado cadaadis” si uu ugu qasbo inay is dhiibaan.
Gabdhaha ayaa lagu calaamadeeyay inay ka maqan yihiin fasaladooda tan iyo Decembar 31 xitaa iyagoo sheegay inay tegayaan kulliyadda maalin kasta.
“Ma socon doonno, sinaba,” Aliya Assadi, oo qayb ka ah kooxda, ayaa u sheegtay Al Jazeera.
Baraha bulshada ayaa waxaa aad ugu baahay sawirka ardayda oo ku labisan xijaab iyo lebis jaamicadeed xili ay fadhiyaan jaranjarada banaanka fasalkooda.
Mudaaharaadkoodu waxa uu kiciyay maamulka kuliyada oo, sida ay kooxdu sheegtay, ku khasabtay inay qoraan warqad ay ku aqbalayaan inay ka baaqsadeen fasallada iyaga oo keligood iska jooga guriga. “Waxaan isku daynay inaan diidno laakiin maamulaha iyo macalimiintu waxay noogu hanjabeen inay baabi’in doonaan dhibcahayaga,” Muskan Zainab, ardayad kale, ayaa u sheegtay Al Jazeera.
Saynab waxay sheegtay inay ku faraxsan yihiin in “adduunka oo dhami” ay arkeen iyaga oo lagu qasbay inay fadhiistaan meel ka baxsan fasalka.
Si kastaba ha ahaatee, ardayda ayaa sidoo kale la kulmay bahdil iyo takoorid diidmada ay sameeyeen. “In aan fasalka oo dhan ka joogo meel ka baxsan fasalka maaha wax fiican in la sameeyo. Macalimiintayada iyo ardayda kale way nagu caayaan. Waxay na weydiiyaan dhibka naga haysta inaan xijaabka iska siibno. Maxaad u raaci kari weyday sharciyada, way ku weydiinayaan, “Almas ayaa u sheegtay Al Jazeera.
“Mid ka mid ah asxaabta ayaa u bukooday jidhdilkan maskaxeed.” Ayay tidhi.
Urur qareenno maxalli ah ayaa qoraal u diray dawladda gobolka, iyaga oo dalbanaya in baadhitaan lagu sameeyo maamulka kuliyada iyo macallimiinta “dhibaateynta” ardayda.
Mamnuucida xijaabka ayaa cadho ka dhalisay dalka Hindiya, iyadoo ardayda iyo kooxaha u dooda xuquuqda ardayda ay maamulka kulliyadda ku eedeeyeen inay ka xaglinayaan muslimiinta laga tirada badan yahay.
“Waxaan si adag ugu garab taaganahay si wadajir ah iyo taageero buuxda. Waxaan codsaneynaa in kuwa maamulka ka tirsan ee ka joojinaya gabdhaha muslimiinta ah in ay xidhaan xijaabka laga joojiyo, gabdhahaasna loo ogolaado in ay fasaladooda la soo galaan xijaabkooda, ixtiraamkooda iyo karaamadooda,” Afreen Fatima, oo ah haweeney u dhaq-dhaqaaqa dhaqdhaqaaqa Fraternity ee New. Delhi, ayaa u sheegay Al Jazeera. “Waa Islaam nacayb. Waa midab-takoor,” ayay tidhi.
Berberanews.com
Info@berberanews.com
